Lena Qantiqi | Qytetar

04.06.2026 09:23:59

Kontribut ndaj procesit të konsultimit për “Udhëzim Administrativ (MPB) nr. 00/2026 për Procedurat  e Pajisjes me Pasaportë dhe Dokument të Udhëtimit për Kthim” 

PROPOZIM NË KUADËR TË KONSULTIMIT PUBLIK

Për: Ministrinë e Punëve të Brendshme

Lënda: Komente dhe propozime për plotësim/ndryshim të Udhëzimit Administrativ (MPB) Nr. 00/2026 për Procedurat e Pajisjes me Pasaportë dhe Dokument të Udhëtimit për Kthim

Në kuadër të procesit të konsultimit publik për Udhëzimin Administrativ (MPB) Nr. 00/2026 për Procedurat e Pajisjes me Pasaportë dhe Dokument të Udhëtimit për Kthim, paraqes këto propozime me qëllim të qartësimit të dispozitave dhe sigurimit të zbatimit të njëtrajtshëm të tyre në praktikë.

1. Propozim për ndryshim dhe riformulim të Nenit 4, paragrafi 4

Teksti aktual:

"Pasaportat me afat vlefshmërie me shumë se 5 vite nuk mund të aplikohet për pasaportë te re."

Arsyetimi:

Formulimi aktual mund të interpretohet se ndalon çdo lloj aplikimi të ri për personat që posedojnë pasaportë me vlefshmëri më shumë se pesë (5) vjet, përfshirë rastet kur kërkohet ndryshimi i të dhënave personale. Për të shmangur paqartësitë dhe për të garantuar realizimin e të drejtës së qytetarëve për përditësimin e të dhënave personale, dispozita duhet të specifikojë se kufizimi zbatohet vetëm për rastet e ripërtëritjes së pasaportës.

Propozohet që paragrafi 4 të riformulohet si vijon:

"Personi që posedon pasaportë të vlefshme me afat vlefshmërie më të gjatë se pesë (5) vite nuk mund të aplikojë për ripërtëritje të pasaportës para skadimit të afatit të vlefshmërisë së saj. Ky kufizim nuk zbatohet në rastet e ndryshimit të të dhënave personale apo në rastet e tjera të parapara me këtë Udhëzim Administrativ."

1. Propozim për ndryshim dhe plotësim të Nenit 5, paragrafi 1.14

Teksti aktual:

"Nëse aplikuesi përfaqësohet nga njeri prind ose kujdestari, prezantohet vendimi / pëlqimi origjinal i QPS-së ose vendimi i gjykatës për shikim. Një kopje e vendimit dhe dokumenti i identitetit të kujdestarit mbeten në dosje për arkivim."

Arsyetimi:

Dispozita nuk e rregullon qartë situatën kur prindërit janë të divorcuar dhe ekziston një vendim gjyqësor i formës së prerë me të cilin kujdesi dhe përgjegjësia prindërore i është besuar njërit prej prindërve. Kjo ka potencial të krijojë paqartësi dhe praktika të ndryshme gjatë procedurës së aplikimit për pasaportë të të miturit.

Propozohet që paragrafi 1.14 të riformulohet dhe plotësohet si vijon:

"Nëse aplikuesi përfaqësohet nga njëri prind ose kujdestari, prezantohet vendimi ose pëlqimi origjinal i Qendrës për Punë Sociale (QPS) ose vendimi i gjykatës për verifikim. Një kopje e vendimit dhe dokumenti i identitetit të përfaqësuesit ligjor mbeten në dosje për arkivim.

Në rastet kur prindërit janë të divorcuar dhe me vendim të formës së prerë të gjykatës kujdesi, ruajtja ose ushtrimi i përgjegjësisë prindërore i është besuar njërit prind, aplikimi për pajisje me pasaportë për të miturin mund të paraqitet vetëm nga ai prind, duke prezantuar vendimin përkatës të gjykatës."

Përfundim

Propozimet e mësipërme kanë karakter sqarues dhe synojnë rritjen e sigurisë juridike, shmangien e interpretimeve të ndryshme administrative dhe lehtësimin e zbatimit të dispozitave në praktikë, duke respektuar interesin më të mirë të fëmijës dhe të drejtat e qytetarëve për përditësimin e dokumenteve personale.

Personi kontaktues

Lena Qantiqi | lenaalinaqantiqi@gmail.com

ARC / QPD | Tjetër

03.06.2026 13:18:55

KONTRIBUT NDAJ PROCESIT TË KONSULTIMIT PËR “UDHËZIMIN ADMINISTRATIV (MPB) NR. 00/2026 PËR PROCEDURAT E PAJISJES ME PASAPORTË DHE DOKUMENT TË UDHËTIMIT PËR KTHIM”    

Pas shqyrtimit të Draft Udhëzimit Administrativ (MPB) Nr. 00/2026, propozohet plotësimi dhe riformulimi i dispozitave të mëposhtme me qëllim të rritjes së sigurisë juridike, unifikimit të praktikës administrative dhe harmonizimit të procedurave me vendimet e organeve kompetente.

1. PROPOZIM PËR PLOTËSIMIN E NENIT 5

Propozohet që pas pikës 1.14 të shtohet pika e re 1.14.A me këtë përmbajtje:

"1.14.A. Në rastet kur prindërit janë të ndarë ose të shkurorëzuar dhe me vendim të formës së prerë të gjykatës njërit prind i është besuar ushtrimi i kujdesit ose i përgjegjësisë prindërore ndaj fëmijës, aplikimi për pasaportë mund të bëhet nga ai prind, me paraqitjen e vendimit përkatës gjyqësor. Në këto raste nuk kërkohet pëlqimi i prindit tjetër, përveç kur me vendim gjyqësor ose me akt të organit kompetent është përcaktuar shprehimisht ndryshe."

Arsyetimi:

Drafti aktual nuk e rregullon shprehimisht procedurën e aplikimit për pasaportë në rastet kur prindërit janë të ndarë ose të shkurorëzuar dhe ekziston vendim gjyqësor i formës së prerë që rregullon ushtrimin e kujdesit ose të përgjegjësisë prindërore ndaj fëmijës.

Mungesa e një dispozite të tillë mund të krijojë paqartësi në praktikë, trajtim jo të njëjtë të rasteve nga organet kompetente dhe kërkesa të panevojshme për pëlqime shtesë edhe në situatat kur gjykata tashmë ka vendosur për të drejtat dhe detyrimet prindërore.

Plotësimi i propozuar nuk krijon të drejta të reja, por qartëson procedurën administrative në përputhje me vendimet e formës së prerë të gjykatës, garanton respektimin e tyre nga organet administrative dhe kontribuon në mbrojtjen e interesit më të mirë të fëmijës, si parim themelor i legjislacionit familjar dhe standardeve ndërkombëtare për të drejtat e fëmijës.

Personi kontaktues

Daim Çanta | daim.canta@rks-gov.net