Ky Udhëzim Administrativ ka për qëllim standardizimin e procedurave të procesit të gërmimit dhe dokumentimin arkeologjik në tërë territorin e Republikës së Kosovës, duke u mbështetur në përvojat bashkëkohore ndërkombëtare dhe legjislacionin vendor në fuqi. Udhëzimi Administrativ përbën rregullat bazë që duhet të ndiqen dhe të zbatohen nga arkeologët, bartësit e projekteve dhe stafi profesional-teknik gjatë të gjitha aktiviteteve arkeologjike. Obligimet dhe detyrat që duhet të zbatohen gjatë gjithë procesit të gërmimit arkeologjik nënkuptojnë kriteret dhe rregullat siç janë: detyrat e arkeologut, gërmimi, dokumentimi dhe arkivimi i të dhënave dhe materialeve arkeologjike si dhe procedurat administrative.